"Mahatakatra zavatra lalina i Andy Razaf ary liana amin'ny rehetra momba ny saintsika olombelona sady olona mavitrika dia mavitrika rahateo", hoy i Ed Morrow, mpanaogazety nahazo vatsimpianarana tao Yale nitsidika an'i Harlem toerana nahalehibe an'i Andy Razaf tamin'izany.
Andy Razaf moa dia tsy iza fa anisan'ireo mpamoronkira sangany amin'ny tantaran'i Etazonia 🇺🇸 ao amin'ny tontolon'ny jazz ary ny gazety The New York Times mihitsy no milaza an'izany. Teraka tany Washington D.C. izy tamin'ny taona 1895. Andriamanantena Paul Razafinkarefo no tena anarany. Nenitoan'ny rainy ny mpanjaka Ranavalona III. Henri Razafinkarefo no anaran'ny rainy ary maty tamin'ny gera nataon'ny Frantsay tamin-dry zareo nanafika tonga hanjanaka an'i Madagasikara io rainy io. Izany indrindra no nahatonga ny reniny niala an'i Madagasikara tamin'izy bevohoka an'i Andy Razaf.
Jennie Waller Razafinkarefo no anaran'ny reniny, ary zanak'i John L. Waller kaonsily amerikanina mainty hoditra voalohany izay niasa sy nonina tao Madagasikara nanomboka tamin'ny taona 1891.
John L. Waller, dadaben'i Andy Razaf, ankoatra ny maha kaonsily azy, dia mpisolovava, mpandraharaha, miaramila mpitari-tafika ary editora. Andy Razaf rahateo dia fantatra amin'ny maha editoran'ny gazety Negro World izay manantantara manokana amin'ny tontolon'ny mainty hoditra.
Andy Razaf moa dia poeta sy mpamoronkira 500 mahery.
Nisy fotoana iray izay, nandeha teny an-dalana teny i Andy Razaf. Tsy rony tsy ventiny teo, tonga tampoka ny aingampanahiny. Dia inona hoy ianao? Nihirahira izy sady niantsa tononkira teny an-dalana teny toy ny hoe any amina tontolo hafa izany no sady manohy ny diany hatrany.
Variana ireo olona niaraka taminy.
Hafa kely i Andy Razaf.
Kanefa dia tsy fantatry ny Malagasy loatra izy na dia nahavita zavatra sady namela zavatra mamy ho an'ny tontolon'ny mozika sy ny literatiora aza.
Ny Amerikanina no tena mankalaza azy. Nefa sady Malagasy ihany koa izy, tokony ankalazaina kokoa.
Tsy nanadino an'i Madagasikara mihitsy izy ary voalaza fa nanana faniriana hanoratra operà mikasika an'i Madagasikara niaraka tamin'i Fats Waller namany, saingy indrisy, maty tanora ity namany, dia tsy tontosa hatramin'ny farany ny faniriany.
Variana izao Ranavalona III mahare ny tantaran'ny zafikeliny tany Harlem.
Dieny mbola kely ity zafikelin'i Ranavalona III ity dia efa nanomboka nanoratra sy namorona.
Kely dia kely.
Vao tamin'izy 10 taona monja dia efa nanoratra hira ary tamin'izy 17 taona kosa dia efa nanomboka nahalafo ny hirany izy.
Io amin'ny sary io i Andy Razaf tamin'izy 10 taona.
Mifampijery izy mianaka, dia mifampitsiky.
